شێركۆ بێكه‌س، به‌ یه‌كێ له‌ گه‌وره‌ترین شاعیرانی هاوچه‌رخی كورد داده‌نرێت. شێركۆ ساڵی ۱۹۴۰ له‌ بنه‌ماڵه‌یه‌كی ئه‌ده‌بپه‌روه‌ری شاری سلێمانی له‌ دایك بوو. فایق بێكه‌سی باوكی شێركۆ خۆی یه‌ك له‌ شاعیره‌ كلاسیكه‌كانی كورد بوو. فایه‌ق بێكه‌س، كاتێك شێركۆ ۱۳ ساڵی بوو، كۆچی دوایی كرد. شێركۆ بێكه‌س له‌ ۱۷ ساڵانه‌وه‌ ده‌ستی به‌ نووسین كرد و له‌و ده‌مه‌وه‌ هه‌تا دوا رۆژی ژیانی ده‌ستی له‌ هۆنینه‌وه‌ی و شیعر نووسین هه‌ڵنه‌گرت. شێركۆ بێكه‌س له‌ ماوه‌ی ۷۳ ساڵ ژیاندا ده‌یان دیوانی شیعری چاپ و بڵاو كردووه‌. دوایین كتێبی شێركۆ بێكه‌س كۆمه‌ڵه‌ شیعری “خێراكه‌ مردن خه‌ریكه‌ بگات” ساڵی ۲۰۱۳ له‌ لایه‌ن ناوه‌ندی “غه‌زه‌لنووس” ه‌وه‌ له‌ سلێمانی له‌ چاپ درا و به‌ سه‌رپه‌رشتی شاعیر خۆی بڵاو كرایه‌وه‌. “نووسین به‌ ئاوی‌ خۆڵه‌مێش” ناووی په‌رتووكێكی بیۆگرافی شاعیره‌ كه له‌ دوو به‌رگدا‌ دوای مردنی له‌ لایه‌ن ناوه‌ندی غه‌زه‌لنووسه‌وه‌ بڵاو بوویه‌وه‌. شێركۆ بێكه‌س له‌ رێگه‌ی شیعره‌وه‌ شۆڕشێكی مه‌زنی له‌ زمانی كوردی و به‌ تایبه‌ت شێوه‌اری سۆرانیدا به‌رپار كرد.